الأحد، 29 أبريل، 2012

سبتك لها


عشان منيش عاوزه أتعبك
جبتك هنا على مفترق ... إسمى أنا أو إسمها
وعشان منيش قادره أخسرك
سبتك تروح على أرضها .. ونورتلك .. بدمع قلبي دربها
سبتك لها ..
وقلبي بيبكى عليك .. بيبكى منك ومنها
سبتك تروح علي قلبها
وعلي جنب الطريق فوق المحطه كتبتلك
هفضل هنا " مستياك" لو حتى طال بعدك سنه
وبكلى شوق وكلى لهفه ترجع هنا .. تسكن بلادى
وتعيش معايا في حلوها .. سبنى أدوق أنا مرها ...
بس الزمان محيرك .. وخدك بعيد على ضي سكه تغربك
تسكن وعود وبنص كلمه تضيعك
لاء خلاص منتش لها ..
دنا لسا مستنيه روحى .. إرجع بها
دنا لسا ساكنه كلمه زمان أنا قولتها .. "مش هكون غير ليك"
دنا نفسي في عنيك أشوف نفسي .. ويغطى جسمى ضيها
خليك لها .. وتعالى ولو بعد كمان يجى كاااام سنه
أنا قلبي قادر ينسيك حزنها
بس اللى مانعه إنه خايف .. أيوه خايف يا حبيبى من حنان قلبك لها
أيوه خايف يجى يوم وتقوله لا .. منتا ذرعت جوايا الخوف جبال
وكسرت قلبي .. ولهفتى بتزيد ضعفها
ونرجع سوا
وأنا وإنت واقفين على أرض مايله بحملها .. هنسقط سوا
والقطر بيجرى .. وأنا واقفه ضهرى للهوى
وعشان أنا عاوزه عمرك بالسعاده يزيد كمان يجى ميت سنه
هنزل أنا .. وهموت أنا
وهسيب معاك عمرى اللى باقي .. وده اللى هقدر أديهولك
هسيبه معاك وهنزل أنا..
عيشه معاها .. وخليك فاكر كان عمرى ليك من أوله
"خلى بالك من عُمرنا "
عيش معاها .. بعمرى أنا مش عمرها
قلبي ف هواك والحلم لسه بكمله بصرخة أمل
عمرى ف لحظه ما فكرت أكون ضحيتك .. وإخلاصي ليك يزيد معاه قسوتك
وتسكن ملامح ضحكتى دمعه تعكر صوفها
والحلم باقي عليه ثوانى ويختفي
وعشان منيش شايفه غيرك .. ولا عاوزه قلبي يخسرك .. بقيت ضحيه
كل منايا أسعدك.. وأدوس كمان على جرحى وأضغط بالقوى
منا حبي ليك بالغ معانى التضحيه
انا راضيه أسيب حبك لها .. وعمرى لها
لو كانت تقدر تسعدك زيي أنا .. أو حتى تقدر توهبك كلمة واحده
من حبي أنا ...
أنا راضيه أروح من غير روحى .. وأسيبها عندك

أنا راضيه .. سبب موتى تكتبه بنفسك
في الشهاده اللى هتفضل ساكنه عندك

"راحة ضحية حبها

الأحد، 22 أبريل، 2012

حبيبتى سامحينى



بغمض عينى
عشان أحلم وأشوفك جاى تقولي
"حبيبتى سامحينى"
وإنك جاى تعيش عمرك ما بين إيدى
وتقسم حزنك بينى وبينك ..
أقولك ماشي
هعيش جنبك
منا في بعدك أكيد ميت
بس بشروط ..
تقولى حبيبتى تؤمرنى وأكيد ماشي
ومهما تقولى هيتنفذ .
منا لو جبتلك ماسه وجبت حتة من الجنه
متكفيشي
هقولك لاء منيش عاوزه
أنا ماستى أكيد إنت
وقلبي لما حطيته في يوم في إيديك
رفض يرجع
مهو حس بحنان لمسك ..
وشال حبك وراح في ساحة العشاق
وهتف هناك باسمك
ورحت استنى يوم قلبك في عيد الحب
وقطفت ورده وقلت مش هينسانى
طلع ينسي
وخلص خلاص عيد الحب
وإنكتبلي تحت الشتا ملقا
ورحت أستنى ومجيتشي
وخلاص مالبرد مش قادره
وبستنى يجيلي حضنك عشان أدفا ...
مبدفاشي..
وأنا واقفه مستنية
تيجى الغريبة وتقولى
حبيبك بعتلك معايا كام كلمة
كان نفس قلبك يسمعها
بس الشتا دايما بيمسح حروف الحب
وأنا عارفه حبيبي
في الأصل مكتبهاشى
لكن راجع
لازم يرجع
ويكتب رسالة بستناها
"يقولى حبيبتى سامحينى "
وأقوله ماشي بشروطى
يقولى حبيبتى أنا تؤمرنى
حبيبتى أكيد ماشي

  ...